Recent Favourites

 

呢罌cream响法國買嘅，二十歐左右。佢朕玫瑰味香而清，質感似雪花膏，又夠潤，冬天用一流。日夜都用佢！

 我成日無端端會生粒粒，最憎就係果D㩒落去會紅會痛但唔凸起又唔熟。呢隻Tea Tree Gel就啱晒數。我每次感覺邊樹會起瘡，就會搽一大pat上去，有兩個結果：一係24小時內謝咗，一係48小時內會谷出嚟然後可以擠走，要視乎粒瘡勁D定Tea Tree勁D。

 剛去完日本，講真今次行藥房真係無乜收穫，Sasa卓悅Log-on仲多嘢睇。本身都用緊Dr Jart BB Cream，實在無乜需要再買，但呢隻Kiss嘅UV Base質地幾好，搽上面好薄，遮紋同毛孔十分好，印同黑眼圈就唔係遮得太好，但勝在無BB Cream咁厚同咁乾。

 都係難得嘅藥房戰利品。屋企支洗掃係藍色，洗唔到sponge (試過，但個sponge都變埋藍色)。呢支洗sponge水係透明同有小小梘，今日試用，洗得乾淨之餘連D藍色都甩到。

之前蘋果介紹過，得萬寧有得賣，買過一支之後就長期決貨。呢隻泡泡卸裝卸得乾淨又平，唯一缺點係醃眼。

Paul Lafayat vs Laduree

法國之旅俾咗我好多個第一次, 都係同食有關. 以前唔食生蠔, 因為食親都腥, 自從食過法國新鮮果D, 立即愛上! 另一樣就係Macaroon, 我以前唔多食Macaroon,覺得又甜又韌都唔知有乜好食, 係Pierre Herme令我改觀.

最近試咗2間主力賣Macaroon嘅cake shop:

Paul Lafayat - 除咗Macaroon, 都有其他西餅. 西餅真係好好好食, Macaroon就.....

買咗四小一大, 細嘅大過五蚊銀D, $15一件. 味道就幾好, 但塊餅就硬咗D同韌咗D.

我對呢個Ispahan ($40) 充滿期望, 味道十分, 但係塊餅硬咗D呢...... 仲想當佢漢堡包咁食, 一咬就必晒D cream同生果出嚟..... 失望......

Laduree係法國一間幾出名嘅cafe, 上次經過Champ Elysse見到, 但當時我哋target唔係搵Laduree, 所以無入去...... 最近响 Joyce Boutique 擺咗booth, 好似只係擺一個月, 於是排隊買番盒.

呢盒係八個裝, 佢有六個,  八個同十幾個裝, 我貪呢個盒靚D!

有10款味揀, 但由於得八個位, 只好捨棄咖啡同檸檬 - 我相信檸檬應該幾好味同清新.

餅夠鬆脆, 大力少少都好似想爛咁. 味道方面我最鍾意Raspberry, 夾响裡面嘅唔係jam, 係堅果肉, 好正呀!! 最surprise係caramel, 另外最失望係玫瑰, 夾响裡面嘅係薑味嘅cream, 最最最憎就係薑! 呢8姊妹都幾貴, standard macaroon size $30一件.

iijin

琴日同老公去拍拖. 聖誕就快到, 梗係"lur"老公送禮物俾自己啦!

如果讀書時肯打下籃球跳下繩, 今日就未必須要呢對iijin. 想買呢對係隱藏4吋嘅厚底布鞋好耐啦, 如果上年無買到對Ferragamo嚟結婚用, 可能會用呢對嚟襯婚紗, 但最後都買咗. 有咗佢, 我可以好自信地做人喇!!

買對鞋之前, 同老公去睇Tatababy袋. 其實前幾個月已經放棄呢個袋, 偏偏朋友話個袋又輕又噤用, 但我覺得幾千銀一個袋而週街都有人用, 搞到想要又唔想要, 十五十六咁. 但個袋仍然好hit, 但從來無响Liger or Shine見過真身, 得知响金百利一間水貨鋪有得賣, 嘅然行到嚟門口就去睇下有無啦.

果然有, 搞笑嘅係平時响米蘭站見Birkin鑲响玻璃櫃, 金百利果間嘢係將Tatababy鑲响玻璃櫃!

金毛Sales當然樣串啦, 我話想睇下個袋, 佢問我有無訂貨, 好明顯我無啦, 咁佢就話無訂要$3280, 訂貨$2980三月度貨. 但仍然無意識打開個玻璃櫃. 備註: 玻璃櫃show咗2隻色, 地下放咗約十個未處理嘅袋, 仲用個大膠袋入住. 然後我問有無其他色睇, 佢竟然攞叠print out俾我, 咁我話想睇實物, 呀金毛Sales指住地下果堆袋話 "你睇呢D囉". 我等咗約兩秒, 呀金毛Sales仍然無行動, 例如由佢個cashier位行出嚟, 或者打開個玻璃櫃, 或者麻煩响地下拆開個膠袋, 咁我就轉身離開.

三千幾我俾得起,但俾得唔值囉. 一月去日本時會留意一下比Tatababy更棒嘅袋好過!

Konapun 大人煮飯仔

早前facebook不斷流傳一條日本人玩煮飯仔嘅youtube, 簡直係將真正煮飯步驟轉化成miniature. 咁當然唔食得啦, 但一個又一個amazing步驟, 剩係過程都夠晒本.


終於自己買咗套嚟玩.

都係搏一搏响Yahoo Auctions有無人放, 最終以$200交易, 我諗算抵啩.......

內含以下工具:

 

 仲有呢D餸.....

很有成功感!!

至強Website 推介

Par-don honeymoon之旅除咗買嘢之外, 巴黎食得開心, 响倫敦就餓親...... 我曾經都响英國都生活過幾年時間. 經過果幾年嘅boarding school折磨, 死都要衝返香港, 隨即讀大學. 老老實實, 正式响倫敦生活嘅日子只有少於一年, 仲係zone 5...... 我對英國或者倫敦嘅伙食真係媽媽地. 以前就話homesick出親去都要整碗叉燒飯, 對於一D頗地度嘅餐廳或者食物都只會响學校或者附近town仔能品嚐到. 都成十幾年前喇! 果陣時邊識米之蓮果D勁嘢吖, 又無錢, 乜都就住洗.

大個喇, 俾得起機票錢, 食得起米之蓮. 英國有個餐廳website, 好似Openrice果種, 不過強好多:

http://www.toptable.com/

一樣有餐廳review同介紹, 分別強在3方面:

1. 可透過website book檯. 上次就試過book Robouchon, 好有系統架. 先揀餐廳, 再揀想食lunch, tea 或 dinner, 再選擇有位嘅time slot. 食客會即時見到有無位, 第二日會有email confirm booking. 呢個service簡直無懈可擊!

2. 倫敦每年都有餐飲節, 响餐飲節前後日子各大餐廳都會推出優惠俾食客,大家食得開心又做到生意. 香港頂盡做D信用卡七五折仲將價就貨, 又星期五/六唔用得. 經Top table訂位, 有好多高級餐廳會做2 for the price of 1, 即買一送一! 呢方面香港真係要參考英國嘅大方文化! 好多Celebrity chef平時都有優惠架.

3. 透過Top table訂位都要開account, 呢個account當然唔係淨係訂位咁簡單. 開個account會加分; 及所有經Top table訂位都可以寫食評又會加分, 呢D分儲到一個程度可以換一餐飯. 最近收到個promotion我只須要book多餐飯就會送一餐飯俾我.

呢個website真係太強, 其實佢已經擴展至歐洲同美國, 第日去去旅行, 唔怕無啖好食啦!

師奶恩物

細個時成日見到婆婆, 一坐低食嘢就會攞個勾出嚟, 一邊掂住張檯, 一邊勾住個袋, 有時勾住袋送.

直至早年我都仲覺得個勾好鑼, 最後早幾日自己買咗個........

不得不承認呢個勾真係好有用, 有時買咗D嘢唔想放地下又唔想攬住放响膝頭, 特別係食物.

Hair cut at Salon Square

當你好想好想剪時, 唔剪得

當你剪得嘅時侯又唔敢剪

正正就係我心情。

成世人小學至三/四年班剪過瀏海, 大學時剪過一次, 跟住廿齡歲剪過一次。一直向自己承諾, 結婚後要剪瀏海, 點知撻Q。話說上次响 Toni & Guy 度剪, 諗住搵個架妹senior stylist剪實掂啦, 可能言語溝通上出咗D問題, 效果出嚟係一層好薄嘅瀏海...... 最後係將成束頭髮搲埋响一邊, 同剪前係無分別. 諗住等D頭髮長番D先再剪。

事隔個幾月, 仍然好想剪, 但又怕剪完唔好睇, 心諗, 頭髮曉生架, 剪!!!


點解無啦啦會搵到呢間salon呢？其實老公以前响Lobby搵開一個女髮型師剪，後尾Lobby執笠，該位stylist轉做做Freelance，基地就係Salon Square。朋友P都係搵呢位stylist操刀。成間salon嘅stylist都係freelance嚟㗎。

今次D蔭剪得較保守，等頭髮留長D時先狠狠地剪短。