結婚後時常被問及生仔大計。自問年紀唔算輕，亦同意要襯嫩生，我哋唔討厭小朋友，但生仔確實需要有周詳嘅準備，社會嘅轉變令我哋想生但產生變數，生仔並非一件容易事。

身邊有親戚/朋友已分別為人父母，覺得要成為父母除咗要付出百分百時間同心機，金錢亦係必須條件: 飯可以唔食，琴唔可以唔學。

有次睇咗一個關於現代家長管治仔女嘅節目。裡面提到父母為求子女能夠入到男拔喇沙瑪利諾，連去旅行都要帶埋功課去做，去溫習；琴棋書畫無所不懂；一個普通話一個英文夾攻成trilingual 。相信人人都聽聞過，各家長可能有更絕嘅方式去谷子女。依家小朋友未夠2歲要上playgroup，甚至有D連B都未有已經搵定學校。呢種谷到行嘅方式，對一個3歲都冇嘅人仔點消化？

今日坐地鐵，一條escalator有4名孕婦，令我意識到一個更早嘅問題，就係床位分配。我哋香港嘅公立及私立醫院已經進一步被國內同胞侵佔。有次同大肚中朋友傾起床位嘅問題，佢嘅一位醫生朋友話剩係收國內証嘅利是都十幾萬，香港証直情唔接。

呢種湊仔trend令我覺得他日我有小朋友嘅時候，我必須使用同等方法去栽培佢，先能成為一個稱職嘅媽媽，一係送佢到英國接受最好嘅教育。Sorry，我未能convince到自己做父母要兼備以上職責。天呀，D小朋友係咪欠咗我哋大人，定係大人欠咗佢，今世我哋有緣成一家人要互相都咁辛苦...... 依家D小朋友就係錢，被塑造成金叵羅、掌上明珠，我覺得佢哋少咗一份童真。

雖然未成為母親，但意識到過份嘅保護小朋友我怕佢哋長大後唔識面對失敗，輕則倚賴屋企，重則喊自殺。我覺得好悲哀，我哋細個時唔係天生天養嗎？呢個只係其中一個社會問題，要深入抒發寫一千字論文都唔夠。懇請新一代父母review一下閣下所采用嘅態度及方式對小朋友未來嘅影響。